Lautaro Martinez ishte heroi i mbrëmjes për Interin, që me golin e tij vendimtar arriti që t’i jepte tri pikët skuadrës së Simone Inzagit për të marrë kreun e klasifikimit.
Në momentin më të vështirë shfaqet gjithmonë kapiteni…
Nuk ishte një ndeshje me shumë kualitet nga ana jonë, por vumë zemrën dhe shpirtin në fushë. Ishte e rëndësishme që të merrnim 3 pikët pas humbjes kundër Juventusit që na bëri keq. Por jemi në këmbë dhe gjithmonë të përqendruar për të fituar çdo ndeshje. Jam i lumtur për fitoren, skuadrën dhe tifozët.
Çfarë mesazhi donit që të jepnit për tifozët?
Disa festime dalin nga shpirti. Kur flitet kaq shumë keq për një person sigurisht që nuk të vjen mirë. Ajo që ka ndodhur në ndeshjen e mëparshme më bezdisi shumë. Nuk kam bërë kurrë blasfemi, edhe pse ndoshta kam sharë. Më ka dhënë shumë bezdi gjithçka u tha. Njerëzit e dinë çfarë babai jam.
Çfarë mesazhi ishte për Napolin kjo fitore?
Ne donim t’i jepnim një mesazh vetes. Që jemi të fortë dhe kur lëmë gjithçka në fushën e lojës mund të fitojmë. Duhet që të rritemi në këtë aspekt.
Jo keq dy Martinezat këtë ndeshje…
Jam i lumtur për të. Ka punuar shumë gjatë kësaj kohe. Nuk kemi pasur Zomerin këtë ndeshje, por Jozef u përgjigj ashtu siç duhet. I bëj komplimentet e mia.
PANORAMASPORT.AL
