Trajneri i Tiranës, Bledi Shkëmbi, ka folur për mediat në prag të ndeshjes kundër Egnatias, që do të luhet nesër në orën 18:00 në Rrogozhinë dhe do të transmetohet drejtpërdrejt në RTSH Sport.
Tekniku i bardhebluve vlerëson kundërshtarët që luajnë për kreun e renditjes, por thekson se Tirana nuk e ka luksin që të gabojë në këtë takim.
“Gjithmonë që ka presion, edhe pse ndryshojnë objektivat, është te të dyja skuadrat. Duhet të bëjmë maksimumin për të kaluar këtë situatën ku jemi, Egnatia është më e qetë, lufton për vendin e parë, i falen dhe gabimet, ne nuk e kemi atë luks dhe duhet të jemi shumë të përqendruar.
Tirana duhet të jetë më e përqendruar se në çdo ndeshje, në të dyja fazat e lojës, te rastet që krijojmë, te rastet që mbrojmë duhet të jemi të përqendruar pasi Egnatia ka lojtarë që bëjnë diferencën dhe të ndëshkojnë nga momenti në moment”, ka thënë mes të tjerash Shkëmbi.
