Përfaqësuesja serbe ka nisur një luftë të hapur me Juventusin, sa i përket situatës së Dushan Vlahoviç. Sulmuesi serb është gozhduar në stol nga Tiago Mota dhe trajnerit të rivalëve të Shqipërisë në eliminatoret e Botërorit, Dragan Stojkoviç, nuk i pëlqen aspak kjo situatë.
Ndaj në konferencë për mediat ai ka folur hapur kundër klubit bardhezi, duke theksuar se atje nuk po përjetohet një situatë e mirë dhe se ai do të mbështeste gjithmonë futbollistin.
“Kam një opinion të lartë dhe të mirë për Vlahoviç dhe cilësitë e tij. Në futboll mbërrin një moment në të cilën ndjehet një atmosferë negative në klub. Nuk do të hyj në detaje dhe nuk do të komentoj arsyen se pse nuk luan dhe pse duhet në fakt që të aktivizohet më shumë. Janë punët e tyre.
Çdo lojtar ka momente pozitive dhe negative në karrierën vet, ne e vlerësojmë Dushan si një nga pjesët më të rëndësishme të lojës tonë. Por me mua do të luajë gjithmonë, pasi këtu ka mundësinë të tregojë se ajo që po i bëjnë nuk është e drejtë.
Vlahoviç përfaqëson valën e gjeneratës së re që duhet të luajë për Serbinë për 10 vitet e ardhshme. Ka nevojë për ndihmën e shokëve të skuadrës në mënyrë që cilësitë e tij të nxirren në pah”, ishin fjalët e trajnerit të Serbisë.
PANORAMASPORT.AL
