Vinicius Zhunior ka barazuar rekordin e golave të Ronaldo Nazarios te Real Madridi, me golin e realizuar në humbjen ndaj Valencias.
Vinicius u bë golashënuesi më i mirë brazilian tek Real Madridi së bashku me legjendën Ronaldo Nazario, teksa shënoi golin e 104-të me fanellën e ‘Los Blancos’ ditën e sotme.
Ronaldo e kishte arritur këtë rekord në vitin 2007 dhe iu deshën 177 ndeshje për ta kapur atë shifër të golave.
Viniciusit në anën tjetër iu deshën 303 ndeshje për të arritur këto shifra. Braziliani e kishte nisur keq ndeshjen ndaj Valencias, pasi në minutën e 12-të dështoi të shënojë nga penalltia.
Sidoqoftë, ai e përmirësoi gabimin e tij në minutën e 50-të duke barazuar rezultatin në 1-1, por kjo nuk mjaftoi pasi Hugo Duro realizoi në minutën e 91-të për t’i dhënë Valencias fitoren.
Kjo humbje që pësoi Real Madridi mund të jetë fatale në shpresat e tyre për të fituar La Ligan këtë sezon.
Në rast se Barcelona fiton ndeshjen që ka në duar ndaj Real Betisit, atëherë diferenca mes tyre dhe blaugranasve si lider do të ishte gjashtë pikë.
PANORAMASPORT.AL
