Ja ku rikthehet sërish një prej ndeshjeve që është duke u shndërruar në një klasike të Europës.
Interi do të sfidohet me Barcelonën në gjysmëfinalet e Ligës së Kampionëve, një rival që në fakt sjell kujtime të bukura, por edhe të hidhura për zikaltrit. Në historinë e dueleve europiane, Interi dhe Barça janë sfiduar me njëri-tjetrin plot 16 herë dhe bilanci është i dukshëm në favor të ekipit katalanas.
Barcelona ka arritur që të marrë 8 fitore, ndërkohë që zikaltrit kanë fituar vetëm 3 herë. Pesë ndeshje kanë përfunduar në barazim mes të dyja ekipeve. Edhe golat e shënuar janë në favor të Barcelonës me 27 të tillë kundrejt 15 të zikaltërve. Mirëpo, sfidat e fundit kanë qenë në favor të Interit me 1 fitore dhe një barazim 3-3, që ka eliminuar nga faza e grupeve në vitin 2022 ekipin e drejtuar në atë kohë nga Ksavi Hernandez.
Interi shpreson që të bëjë si në vitin 2010, kur eliminoi pikërisht ekipin katalanas me Zhoze Murinjon dhe në fund arriti që të ngrinte trofeun në finalen e madhe të Madridit. Megjithatë, katalanasit janë një rival i vështirë dhe po kalojnë një moment të jashtëzakonshëm. Dy sfida të mëdha na presin sërish në Ligën e Kampionëve.
PANORAMASPORT.AL
