Dhe në fund arrin… Duglas Luiz. Sepse do të vijë edhe momenti i tij në Juventusin e ri të Tudorit, dhe ndaj Parmës në Pashkë mund të vijë debutimi i tij i ri, me trajnerin e ri.
Një histori që duhet shkruar nga e para dhe një kureshtje që rritet bashkë me besimin për ta parë sërish në fushë. Ndoshta i gjallëruar edhe ai nga ndryshimi i trajnerit, siç ndodhi me Kopmeinersin dhe Niko Gonzalezin.
Në kampionat nuk është parë që nga fillimi i marsit për shkak të një dëmtimi në bicepsin femoral. Para kësaj, kishte luajtur 20 minuta ndaj Kaljarit, dhe më parë s’kishte qenë fare i disponueshëm, për shkak të një dhimbjeje muskulore pas vetëm gjysmë ore loje ndaj Komos. Dhe duke shkuar edhe më pas në kohë, shihet vetëm një sezon me ndërprerje, shumë keqardhje dhe ato shifra të zakonshme, të përsëritura dhe të rënduara, te një karton që peshon më shumë se 50 milionë euro.
Për vetëm 22 paraqitje që braziliani ka bërë këtë sezon, është si të thuash se ka kushtuar mbi 2 milionë për ndeshje. Në kampionat, seria më e gjatë e ndeshjeve radhazi është pesë. Nga fundi i dhjetorit deri në fund të janarit, nga Fiorentina deri te humbja e parë në Serinë A kundër Napolit. Pak, shumë pak, për një investim të atij niveli. Por Tudor, ai që “rregullon gjithçka”, mund ta rikthejë edhe atë, ose të paktën këtë shpresojnë klubi dhe tifozët për 6 ndeshjet e fundit.
PRITJE DHE BESIM— Kopmeiners është kthyer, Niko Gonzalez vazhdon të rritet dhe sidomos me kroatin në stol ka hequr atë mbulesën e fantazmës nën të cilën nuk kishte arritur kurrë të shprehej plotësisht. Sigurisht, argjentinasit i mungon goli (vetëm një deri tani në kampionat, rekordi më i dobët në karrierën e tij), por ta shohësh të përfshirë dhe duke përshkuar metra e metra në fushë si kurrë më parë është një hap i madh përpara. Prandaj, tani mbetet të shihet efekti “Tudor” mbi blerjen e dytë më të shtrenjtë të revolucionit veror. “I çmendur” është mbiemri që kroati ia ka bashkangjitur disa herë ish-lojtarit të Aston Vilës, për t’i dhënë menjëherë një injeksion besimi duke u bazuar vetëm tek ajo që ka parë në stërvitje. “I çmendur” ai, goditja e tij, vizioni i lojës. “I sheh të gjitha, ka një përshpejtim në 10-15 metra, por ndoshta në hapësira të mëdha nuk është pika e tij më e fortë…”.
Pra, i aprovuar, por me rezerva. Sepse Tudor ka vlerësuar menjëherë cilësitë dhe në të njëjtën kohë ka njohur kufizimet e një lojtari që ende nuk ka dëshmuar asgjë në Serinë A. Një version i dobët i mesfushorit të marrë nga Premier Liga. “Gjithsesi, është bukur ta kemi, është një aset i rëndësishëm. Vjen nga një vit me shumë dëmtime, është e vërtetë, por në këto ndeshje të fundit do të ketë hapësirë për të gjithë”.
Edhe për Duglas. Sidomos tani që janë lënë pas problemet fizike dhe çdo diskutim tjetër, bilanc apo vlerësim është shtyrë për në verë, kur “Zonja e Vjetër” mund të trokasë sërish në dyert e Premier Ligës, siç bëri në janar, për të parë nëse dikush do të ishte i interesuar të rikthente në Angli atë lojtar që kishte bërë aq mirë pikërisht atje, me Aston Vilën. Por më parë, fundi i sezonit. Tani për të ka rëndësi vetëm e tashmja. “Dhe gjëja e rëndësishme është që ai është i fortë, mund të na japë diçka dhe me siguri do të na japë”, ka thënë Tudor.
PANORAMASPORT.AL
