Leandro Trosard është i zhgënjyer pas barazimit 2-2 të Arsenalit me Kristal Palasin në Premier Ligë, por e bëri të qartë se fokusi tashmë ishte zhvendosur te gjysmëfinalja e ardhshme e Ligës së Kampioneve kundër PSG-së.
Sulmuesi belg nuk u përpoq ta fshehë zhgënjimin për paaftësinë e skuadrës për të ruajtur avantazhin në një ndeshje ku kryesuan dy herë.
“Mendoj se në përgjithësi nuk ishte një paraqitje e mirë nga ne”, tha Trosard për kanalet e klubit. “Duhej të ishim më mirë, veçanërisht kur je në avantazh dy herë. Duhet ta mbrosh mirë atë epërsi. Kjo nuk është ajo që bëmë, por tani thjesht duhet të përqendrohemi te ndeshja e radhës”.
30-vjeçari, i cili ka shënuar katër gola në po aq ndeshje kampionati dhe ka arritur shifra dyshifrore golash këtë sezon, sërish dha atë që duhej, duke finalizuar saktë në fund të pjesës së parë. Por gabimet në mbrojtje dhe një gol i vonë nga kundërshtari, i mohuan Arsenalit sërish fitoren, duke bërë që ata të regjistrojnë barazimin e 13-të sezonal në kampionat Megjithatë, Trosard është i ndërgjegjshëm: “Sigurisht, duhet të jemi më të mirë.
Sidomos me një ndeshje të madhe që po afron. Duhet të pushojmë dhe të përgatitemi mirë për atë”. Kjo do të jetë sfida e parë gjysmëfinale e Ligës së Kampioneve në shtëpi kundër PSG-së dhe është pikërisht kjo lloj mbrëmjeje që Trosard e përjeton me pasion të veçantë. Pasi regjistroi një rol kyç në fitoren spektakolare ndaj Realit të Madridit në çerekfinale, Trosard lëshoi një thirrje për tifozët që ndihmuan në krijimin e asaj atmosfere të paharrueshme.
“Mendoj se të gjithë janë të motivuar për këtë”, tha ai. “Kemi gjashtë ditë për t’u përgatitur, duhet të pushojmë tani, të përgatitemi shumë mirë, dhe besoj se të gjithë do të jenë gati. Me tifozët pas nesh, duhet të krijojmë një atmosferë elektrizuese, ata do të na shtyjnë përpara. Duam të njëjtën atmosferë si herën e kaluar, ata ishin të jashtëzakonshëm në shtëpi kundër Realit. Nëse mund ta bëjmë sërish, do të ishte e mrekullueshme”.
