Barcelona dhe Interi kanë dhuruar një përballje të parë spektakolare mes tyre në gjysmëfinalet e Ligës së Kampioneve, në një sfidë të mbyllur me shifrat 3-3 që lënë gjithçka të hapur për duelin e javës së ardhshme në Itali.
Ndeshja filloi me gol pas pak sekondash, pasi ishte Interi që shënoi me Turam pas një goditje me finte, ndërsa pak më vonë gjeti edhe golin e dytë me një “gërshërë” të Dumfris. Përgjigja e shpejtë e Barcelonës me një gol spektakolar individual të Jamal i dha më shumë vrull katalanasve, të cilët sulmuan dhe gjetën edhe golin e barazimit me anë të Ferran Torres.
Katalanasit vazhduan të dominonin me lojë e me raste, por çdo gjuajtje në katërkëndor e Interit përfundonte në rrjetë. Kështu ndodhi edhe me golin e tretë të Dumfris pas një goditje këndi. Por edhe këtë herë katalanasit nuk vonuan të barazonin kur një gjuajtje e Rafinjas e kthyer nga traversa u përplas te Zomer e shkoi në rrjetë.
Interi pa t’i anulohej goli i katërt për një pozicion jashtë loje, ndërsa traversa i mohoi golin e radhës Jamal. Kësisoj, ndeshja u mbyll me një barazim spektakolar 3-3, që lë gjithçka hapur për duelin e kthimit në Itali.
BARCELONA-INTER 3-3
24′ Jamal, 38’ Ferran Torres, 65′ (ag) Zomer / 1′ Turam, 21′, 63′ DumfriS
NGJARJET KRYESORE
90’+3’ Mbyllet ndeshja me barazimin 3-3.
90’+1’ Rafinja lëshon një tjetër predhë nga distanca, Zomer devijon mbi traversë. (VIDEO)
87’ Jamal nga e djathta tenton një supergol me një top të ccuar mbi mbrojtësit, sfera ndalet në traversë e largohet nga prapavija zikaltër. (VIDEO)
83’ Kubarsi dhe Pedri dalin nga loja për t’i bërë vend Kristensen dhe Gavit.
81’ Darmian dhe Zielinski hyjnë në fushë në vend të Dumfris dhe Turam për Interin.
75’ Dumfris nga e djathta nis një asist në shtyllën e dytë për Mkhitarjan i cili mposht Sheznin. Por gjyqtari anulon golin për pozicion jashtë loje të armenit. (VIDEO)
71’ Turam niset drejt zonës, një ndërhyrje vendimtare e Kubarsi shpëton portën e katalanasve. (VIDEO)
71’ Fratezi merr vendin e Çalhanollu.
67’ Olmo i lë vendin ën fushë Fermin Lopez.
65′ GOOOL BARCELONA! Kundërpërgjigje e katalanasve me një top te gjuajtur nga distanca të Rafinjas, sfera përplaset në traversë, në kokën e Zomer dhe pastaj përfundon në rrjetë. (VIDEO)
63’ GOOOL INTERI! Në një tjetër goditje nga këndi, Dumfris me kokë gjen hapësirën për të gjuajtur dhe kthen në avantazh zikaltrit.(VIDEO)
62’ Kundërzbritje e shpejtë e Interit nga e djathta, Arauho në fund ia del të devijojë në këndore një pasim të rrezikshëm që po shkonte drejt rrjetës.
57’ Jamal nga e djathta gjen hapësirë për të gjuajtur, por tentativa e tij është e lehtë dhe ndalet në duart e Zomer.
55’ Dimarko lë fushën e lojës, duke i bërë vend Karlos Augustos.
55’ Gjuajtje e Pedrit nga jashtë zonës, nuk gjen portën e skuadrës italiane. (VIDEO)
49’ Zbritje e shpejtë e Interit nga e djathta, Bisek pason në qendër dhe pastaj topi shkon te Dimarko i cili gjuan por çon sferën mbi traversë. (VIDEO)
46’ Pjesa e dytë nis me Arauho në vend të Gerard Martin te Barcelona dhe me Taremi në vend të Lautaro Martinez te Interi.
45’+2’ Mbyllet pjesa e parë me rezultatin 2-2.
45’ Probleme fizike edhe për Lautaro Martinez, i cili merr ndihmën e mjekëve.
42’ Kunde nuk mund të vazhdojë më për shkak dëmtimi dhe Erik Garsia merr vendin e tij.
38’ GOOOL BARCELONA! Harkim nga e djathta në zonë, Rafinja ul topin në qendër për Ferran Torres i cili nuk e ka të vështirë të shënojë para Zomer. (VIDEO)
36’ Vazhdojnë gjuajtjet e katalanasve drejt portës, këtë herë është nga jashtë zone Olmo i cili gjen përgjigjen e Zomer. (VIDEO)
34’ Përsëri Jamal nga e djathta jep një pasim të rrezikshëm në qendër, Zomer është i vëmendshëm. (VIDEO)
30’ Jamal në të djathtën pason në qendër, Zomer me një dalje të guximshme largon sferën para portës së tij.
26’ Olmo ka mundësinë të gjuajë përballë Zomer, portieri bllokon tentativën e tij. (VIDEO)
26’ Përsëri Jamal i pandalshëm në të djathtën, gjuan në fundore në pozicion të pamundur dhe godet traversën e portës së Zomer. (VIDEO)
24’ GOOOL BARCELONA! Aksion individual i Jamal i cili nga e djathta kalon këdo që i del para dhe me të majtën e tij çon sferën ku Zomër nuk mund të arrijë. (VIDEO)
21’ GOOOL INTERI! Në zhvillimin e një goditje nga këndi, Açerbi ul topin për Dumfris i cili me një goditje spektakolare me “gërshërë” çon përsëri sferën në rrjetë. (VIDEO)
19’ Pas një goditje nga këndi, topi shkon te Torres i cili nga e majta gjuan por sfera kalon pasqyrën e portës dhe shkon jashtë.
12’ Aksion i shpejtë i Jamal nga e djathta, pasimi i tij në qendër gjen Torres i cili gjuan por nuk gjen portën e Zomer. (VIDEO)
11’ Mkhitarjan tenton portën nga jashtë zonës, sfera devijohet nga Martinez në pozicion jashtë loje. (VIDEO)
9’ Jamal rrëzohet pas një kontakti me Bastonin, gjyqtari bën shenjë që loja të vazhdojë. (VIDEO)
6’ Barcelona provon me aksione radhazi nga krahët të gjejë hapësira, por zikaltrit janë kthyer me shumë forca mbrapa për të shmangur një barazim të shpejtë.
1’ GOOOL INTERI! Pasim nga e djathta e sulmit zikaltër për Turam i cili me finte mposht Sheznin dhe shënon golin e avantazhit. (VIDEO)
1’ Nis dueli i parë gjysmëfinal mes dy skuadrave në Spanjë.
FORMACIONET ZYRTARE
BARCELONA: Shezni, Kubarsí, Inigo Martinez, Kunde, Gerards Martin, De Jong, Pedri, Olmo, Rafinja, Jamal, Ferran Torres.
Trajner: Hansi Flik
INTER: Zomer, Dumfris, Açerbi, Bastoni, Dimarko, Bisek, Çalhanollu, Mkhitajan, Barela, Turam, Lautaro Martínez.
Trajner: Simone Inzagi
PANORAMASPORT.AL
