Vinsent Kompani është trajneri i Bajernit, që nga vera e kaluar dhe që në vitin e tij të parë ka arritur të kthejë gjigantët bavarezë te titulli kampion në Bundesligë. Por lidhja e belgut me kampionët gjermanë mund të kishte filluar shumë më herët.
Një histori e shënuar nga mundësi të humbura dhe vendime familjare e lidh atë me klubin. Ka qenë babai i tij, Pier Kompani, që ka dhënë detaje për lidhjen e djalit të tij dhe Bajernit. E gjitha filloi në një turne për të rinj ku Vinsent Kompani tërhoqi vëmendjen. Uli Hënes, atëherë shefi i Bajernit, e dalloi talentin e belgut të ri dhe i dha kartëvizitën e tij.
Ideja ishte e qartë: Vinsent duhet të transferohej tek ekipi i të rinjve të Bajernit. Por Pier Kompani, babai i Vinsentit, vendosi ndryshe. “Filozofia jonë ishte e qartë: Vinsent duhet të përfundonte me sukses shkollën dhe pastaj të mendonim për një transferim jashtë vendit”, shpjegoi ai për “Bild”. Më vonë, kur Vinsent luante tashmë për Anderlehtin, qarkulluan thashetheme rreth interesit të Uli Hënesit për të.
Vetë Kompani e tregoi këtë anekdotë në konferencën për shtyp para ndeshjes së Bundesligës kundër Lajpcigut. Tani, shumë vite më vonë, rrethi është mbyllur. Kompani është trajner i Bajernit dhe kampion me Bajernin.
PANORAMASPORT.AL
