Karlo Ançeloti ka nënshkruar kontratën për t’u bërë trajneri i Brazilit dhe që nga qershori do të jetë ai në pankinën e “seleçaos” duke e drejtuar këtë të fundit në rrugëtimin e saj drejt ëndrrës së rifitimit të Kupës së Botës. Për të siguruar firmën e trajnerit italian nuk ka qenë e thjeshtë dhe Federata Braziliane ka bërë sakrifica të mëdha ekonomike.
Sipas “Globo Esporte”, trajneri italian do të përfitojë 10 milionë euro neto në vit, e njëjta shifër që iu propozua në vitin 2023 kur ai e refuzoi ofertën për të drejtuar Brazilin. Ai ka rënë dakord pasi kjo është edhe shifra që ai përfitonte në drejtimin e Real Madrid, një shifër jashtëzakonisht e lartë për çdo trajner kombëtareje në botë.
Për më tepër, është vendosur edhe një bonus shumë i lartë për të. Nëse Brazili do të fitojë Kupën e Botës, Ançeloti do të përfitojë 5 milionë euro për arritjen e objektivit.
Duket se trajneri ka nisur menjëherë punën, pasi raportohet se ai ka kontaktuar Kasemiron për ta bindur të kthehet në radhët e përfaqësueses, si dhe ka zhvilluar një video-telefonatë me Nejmar për të mësuar gjendjen e tij me dëmtimin.
PANORAMASPORT.AL
