Drilon Hazrollaj është bërë lajm në Rumani dhe mediumin boshnjak “Sportsport”.
”Lojtari më i shtrenjtë në historinë e ligës së Kosovës nuk dëshiron të luajë për ekipin kombëtar të Kosovës edhe pse është lindur në këtë vend.
Është një lajm që i tronditi të gjithë në Prishtinë.
Diçka po zihet në Kosovë, e cila do të ndiqet me shumë vëmendje në Serbi, veçanërisht për shkak të kualifikimeve të Kupës së Botës.
Kosova nuk duket të jetë aq e rëndësishme sa një ekip kombëtar për të gjithë futbollistët në këtë vend, diçka e ngjashme me Bosnjën dhe Hercegovinën.
Ka shumë shembuj të lojtarëve që u rritën me futbollin në Bosnjë dhe Hercegovinë dhe më pas vendosën të luanin për ekipet kombëtare të Serbisë ose Kroacisë”, shkruan media boshnjake.
“Diçka e ngjashme po ndodh në Kosovë, pasi shumë lojtarë vendosin të luajnë për Shqipërinë.
Ky është edhe rasti me Drilon Hazrollajn.
Hazrollaj është 21 vjeç, luan si mesfushor sulmues dhe këtë dimër bëri transferimin më të shtrenjtë në historinë e ligës së Kosovës.
Rapid Bukureshti ia bleu kartonin e lojtarit për gati një milion euro, më saktësisht 900,000 euro plus bonuse nga klubi i Malishevës.
I riu nga Kosova do t’i bashkohet gjigantëve rumunë në verë, dhe nga Bukureshti erdhën lajme interesante që tronditën Prishtinën”, shkruan më tej.
“Shqipëria – Serbia, këto dy skuadra do të luajnë ndeshjen e tyre të parë në Tiranë në fillim të qershorit.
Hazrollaj nuk do të paraqitet në këtë ndeshje, por me sa duket do të luajë kur serbët të jenë vendas”, shkruan më tej.
Mediumi rumun “GSP”, ka bërë të ditur se Drilon Hazrollaj nuk dëshiron t’i bashkohet Kosovës.
Sipas mediumit rumun, Hazrollaj pret ftesën e Shqipërisë.
“I lindur në Banjë, një qytet në Kosovë, transferimi i ri i Rapidit tundohet nga Kombëtarja e Shqipërisë”, shkruan “GSP”.
Hazrollaj ka shënuar 11 gola me fanellën e Malishevës këtë edicion.
