Real Madrid e mbylli sezonin në La Liga me fitore 2-0 ndaj Real Sociedad, por duke u renditur i dyti pas Barcelonës. Sot ishte ndeshja e lamtumirës për Carlo Ancelotti-n, Luka Modric dhe Lucas Vasquez.
Në fund të ndeshjes, trajneri italian mbajti një fjalim tejet emocionues, ku as ai vetë nuk i mbajti dot lotët dhe sigurisht që as lojtarët dhe pjesa tjetër e stafit të Realit, si dhe tifozët e shumtë të pranishëm në “Bernabeu”.
“Nuk mendoj se është kaq e lehtë të flasësh sot. Ka qenë një nder dhe kënaqësi të stërvit këtë klub, këtë ekip. Së pari, do të doja të falënderoja presidentin tim të dashur, Florentino Pérez.
Ka qenë një përvojë e mrekullueshme, faleminderit për këto momente. Ishte e mrekullueshme ta jetoja me ju gjithë këtë rrugëtim.
Është një histori e paharrueshme.
Askush nuk mund ta harrojë tregolëshin e Benzemas kundër PSG-së, as dy golat e Rodrygos kundër Manchester City-t, as asistin e Modric. Askush nuk mund t’i harrojë dy golat e Joselu-s.
As unë nuk mund ta harroj çdo ditë që kam kaluar këtu. Dhe dua ta përfundoj këtë fjalim duke thënë vetëm “Hala Madrid”.
Ju dua të gjithëve me gjithë zemër”, tha Ancelotti.
