UEFA ka emëruar gjyqtarin portugez Joao Pinheiro për të arbitruar finalen e Superkupës së Europës të vitit 2025, ku do të përballen kampionët e Ligës së Kampionëve, Paris Saint-Germain, kundër fituesve të Ligës së Evropës, Tottenham Hotspur. Ndeshja do të luhet më 13 gusht 2025, në stadiumin “Bluenergy” në Udine, në orën 21:00.
Pinheiro, një gjyqtar ndërkombëtar që nga viti 2016, është një fytyrë e njohur në garat evropiane. Ai ka arbitruar tashmë 68 ndeshje të kompeticioneve të UEFA-s, dhe në sezonin 2024/25 ai ka arbitruar disa ndeshje kyçe, përfshirë ndeshjen e dytë gjysmëfinale të Ligës së Konferencës midis Chelsea dhe Djurgården (1-0). Ai gjithashtu shërbeu si gjyqtar i katërt në fitoren e PSG-së në finalen e Ligës së Kampionëve kundër Interit.
Për këtë Superkupë, Pinheiro do të shoqërohet nga bashkëkombësit e tij Bruno Jesus dhe Luciano Maia si asistentë, ndërsa roli i gjyqtarit të katërt do të mbulohet nga Elchin Masiyev nga Azerbajxhani. Ndihma në VAR do të ofrohet nga Tiago Martins (Portugali), me Fábio Melo (Portugali) dhe Pol van Boekel (Holandë) si asistentë.
