Edicioni i 87-të i kampionatit Abissnet Superiore startoi me një supersfidë në ekranin e Radio Televizionit Shqiptar. Finalja e sezonit të kaluar, përballja Vllaznia-Egnatia, ishte ndeshja hapëse e sezonit të ri futbollistik në elitën e futbollit shqiptar.
Ndeshja në “Loro Boriçi” ka dhuruar emocione të mëdha, me shkodranët që mposhtin rivalët nga Rrogozhina me rezultatin 2-0 dhe nisin me fitore sezonin e ri. I ka të gjitha sfida në Shkodër. Gola, kartonë të kuq dhe penallti, me shkodranët që “marrin hak” për finalen e humbur disa muaj më parë.
Vllaznia zhbllokon shumë shpejt ndeshjen me Gurishtën, që shënon golin e parë të sezonit në Abissnet Superiore. Pak minuta më vonë, trajneri i Vllaznisë, Edi Martini ndëshkohet me karton të kuq për protesta.
Murataj pengohet në zonë dhe pas verifikimit në VAR gjyqtari Maletaj akordon 11-metërsh. Bekim Balaj nuk tregohet i saktë nga pika e bardhë, duke goditur jashtë. Mbetet në fuqi rezultati 1-0 për Vllazninë. Egnatia nuk arrin të reagojë dhe pjesa e parë mbyllet me avantazhin minimal të shkodranëve.
Egnatia mbetet me 10 lojtarë. Wotlai ndëshkohet me kartonin e dytë të verdhë dhe largohet nga fusha me karton të kuq.
Në minutat e mbetura Vllaznia menaxhon avantazhin dhe arrin të marrë një fitore të çmuar 2-0 përballë një rivali direkt. Shkodranët debutojnë me fitore, ndërsa kampionët e Egnatias dalin duarbosh nga “Loro Boriçi”, duke nisur kampionatin me humbje.
