Holanda doli me tri pikë nga përballja me Lituaninë (3-2), por trajneri Ronald Koeman nuk u duk aspak i kënaqur me mënyrën si skuadra e tij menaxhoi ndeshjen.
‘Tulipanët’ e nisën fort, duke shënuar dy gola të shpejtë me Depay dhe Timber, por më pas u përgjumën dhe lejuan rivalët të barazonin. Ishte sërish Depay që shpëtoi Holandën me golin e tij të dytë, duke mbajtur skuadrën në krye të Grupit G, në kuotë pikësh të barabarta me Poloninë.
Pas ndeshjes, Koeman nuk e fshehu zhgënjimin:
“Për fat të mirë fituam dhe nuk lamë pikë. Përndryshe, do të kishte qenë një katastrofë dhe një turpërim i madh për ne.”
Tekniku holandez shtoi se skuadra duhet të mësojë nga kjo përvojë:
“Është e pakuptueshme. Filluam mirë, shënuam dy gola dhe gjithçka dukej perfekte. Por kjo ishte një mësim i madh: duhet të dish si ta mbyllësh një ndeshje, sidomos kur udhëheq me 2-0.”
Koeman vuri në dukje se mungesa e komunikimit dhe përqendrimit solli shumë rreziqe:
“Shikon situata dhe mendon: si është e mundur? Kishte momente të shumta të rrezikshme dhe mungesë komunikimi. Kjo nuk duhet të ndodhë. Nëse luan kështu, nuk fiton asgjë.”
