Që prej largimit nga Real Madridi në vitin 2021, emri i Zinedine Zidane është lidhur vazhdimisht me kombëtaren e Francës.
Dhe gjithnjë e më shumë zëra pajtohen se ai është pasuesi natyral i Didier Deschamps.
Sipas “L’Équipe”, brenda Federatës ka një konsensus pothuajse unanim që “Zizou” të marrë drejtimin pas Kupës së Botës 2026.
Megjithëse presidenti Philippe Diallo këmbëngul se është “shumë herët” për të marrë vendime, figura e Zidane mbetet e pranishme si e ardhmja e pashmangshme e “Les Bleus”.
Debatin e ndezi më tej Thierry Henry, tashmë komentator në “CBS”, i cili nuk u përpoq ta fshehte të dukshmen.
“Nuk di çfarë të përgjigjem. Ne të gjithë e dimë kush do të jetë trajneri i ardhshëm. Ti e di, dhe unë e di. Dhe i uroj më të mirën”, tha ai kur u pyet drejtpërdrejt për Zidane.
Fjalët e tij tingëlluan më shumë si një konfirmim se sa një koment mbi atë që pritet për Francën.
Në të njëjtën linjë erdhi edhe zëri i një miku të ngushtë të trajnerit, i cituar nga “L’Équipe”, i cili deklaroi se “Zidane i di të gjitha” dhe është plotësisht i vetëdijshëm për sa shumë lojtarë duan të punojnë nën drejtimin e tij. Karizma, titujt dhe përvoja e mbajnë atë si figurën më të respektuar për të drejtuar Francën në të ardhmen.
Me Kupën e Botës 2026 në horizont, stoli i kampionëve të botës duket se tashmë ka një trashëgimtar të qartë: Zinedine Zidane.
