Ndërsa pret të rikthehet në fushë, ndoshta kundër Napolit në ndeshjen e radhës të kampionatit, Rafa Leao pëlqen të flasë për veten dhe të zbulojë disa histori prapa skenave që e çuan të veshë fanellën e Milanit në verën e vitit 2019.
Karriera e portugezit mund të kishte ndjekur rrugë të tjera, dhe disa, thotë ai, janë “të çmendura”. Në një episod të podkastit Say Less, numri 10 i kuqezinjve tregoi kur drejtori sportiv i Lille ishte gati ta shiste atë tek Interi: “Thashë jo, doja të qëndroja atje edhe një vit për t’u përmirësuar më tej. Por ai këmbënguli: ‘Duhet të të shes, është një mundësi e shkëlqyer për ty, për ne, janë shumë para’. Por i thashë Interit jo.”
Klubi francez, i përballur me dëshirën e Leaos, hoqi dorë. Por gjithçka ndryshoi brenda tre javësh dhe me një telefonatë: “Drejtori sportiv më tha se Milani ishte i interesuar për mua. Unë thashë: ‘Po, nëse vijnë me një ofertë, do ta pranoj’. Dy ditë më vonë, ai u kthye dhe më tha se oferta ishte aty dhe se dikush donte të fliste me mua. Ai më lidhi me Paolo Maldinin; ai ishte në një video-thirrje. Ai më tha se duhej të vija te Milani dhe se ata ishin gati të më merrnin. Nuk mund të thoja jo.”
Lojtari i lindur në vitin 1999 është magjepsur gjithmonë nga Milani, që kur ishte fëmijë. Kur erdhi puna për të zgjedhur, ai nuk kishte dyshime: “Ronaldinho, Ronaldo, Kaká, Seedorf: këta lojtarë kishin shkruar historinë. Pastaj, shtatë Liga Kampionësh, vetëm Real Madridi ka më shumë. Midis Milanit dhe Interit, zgjedh Milanin njëqind herë.”
