E ardhmja e Dusan Vlahovic-it tek Juventusi duket gjithnjë e më e pasigurt. Pas një vere të kaluar mes polemikave dhe tratativave të dështuara, klubi bardhezi është i vendosur të rikthejë në plan shitjen e sulmuesit serb në merkaton e janarit.
Juventusi, i cili ka investuar fort për afrimin e Jonathan David dhe Lois Openda, e sheh Vlahovic-in si një “peshë” të madhe financiare, me një pagë që arrin deri në 12 milionë euro në sezon. Kontrata e tij skadon në qershor 2026, por duke qenë se sulmuesi nuk ka ndërmend të rinovojë, drejtuesit duan të shmangin rrezikun ta humbin me parametër zero.
Në këtë skenar, Premier League shfaqet si destinacioni më i mundshëm. Chelsea dhe Manchester United, që prej kohësh e ndjekin me interes 25-vjeçarin, mund të bëjnë lëvizjen vendimtare në dimër për të shmangur një garë të ashpër verore. Një ofertë e majme në janar do t’i siguronte Juventusit një fitim të menjëhershëm dhe kursim të gjysmës së pagës sezonale të lojtarit.
Ndërkohë, në fushë, Vlahovic është rikthyer në rolin e “armës sekrete”: nga pankina ka gjetur rrugën e golit kundër Parmës, Genoas dhe Borussia Dortmundit, por nuk ka bindur kur ka nisur si titullar. Trajneri Igor Tudor duket i prirur t’u japë përparësi sulmuesve David dhe Openda, duke e përdorur serbin si alternativë luksi.
Për tifozët, mbetet dilema e madhe: a do të largohet Vlahovic para kohe për t’u dhënë frymëmarrje arkave të klubit, apo do të qëndrojë deri në fund të sezonit për të ndihmuar skuadrën në objektivat madhorë?
