Rimodelimi i stadiumit historik të Real Madridit, i cili po zgjatet prej vitesh, vijon të sjellë risi si brenda ashtu edhe jashtë impiantit. Sipas “El Mundo Deportivos”, këtë javë nisi vendosja e shenjës së re në fasadën kryesore, ku tashmë do të shkruhet vetëm ‘Bernabéu’.
Punëtorët kanë vendosur për momentin vetëm shkronjën B, e cila qëndron e mbuluar me një mbulesë mbrojtëse deri në përfundimin e punimeve.
Ky ndryshim lidhet me vendimin e klubit madrilen që stadiumi të njihet thjesht si ‘Bernabéu’, duke lënë mënjanë emrin e plotë të presidentit historik Santiago Bernabéu. Synimi i kësaj lëvizjeje është që emri të jetë më i lehtë për t’u përdorur dhe për t’u pranuar në çdo kontekst ndërkombëtar.
Edhe pse tifozët nuk kanë reaguar në mënyrë të gjerë, masa është pjesë e një strategjie marketingu mbi të cilën Real Madrid po punon prej kohësh. Objektivi është që stadiumi të shndërrohet në një qendër multifunksionale dhe moderne, duke u kthyer në një pikë referimi jo vetëm për futbollin, por edhe për evente të tjera madhore.
