Sonte pritet një spektakël futbolli në Serie A me përballjen e zjarrtë mes AC Milan dhe Napolit, një ndeshje që do të vërë përballë dy trajnerë të njohur për qasjet e tyre taktike: Massimiliano Allegri dhe Antonio Conte.
Sipas Gazzetta dello Sport, sfida premton intensitet dhe lëvizje të menduara deri në detaj, përcjell ORAinfo.
Forma e ekipeve
Milan ka pasur një nisje solide me 9 pikë në 4 ndeshje, duke fituar në tre përballjet e fundit. Napoli, nga ana tjetër, ka qenë edhe më bindës, sidomos në fazën ofensive, ku ka shënuar gola të shumtë. Kjo e bën duelin e mbrëmjes edhe më intriguese.
Atmosfera në “San Siro”
Gazeta italiane e përshkruan ndeshjen si një “spektakël të vërtetë”. Për më tepër, Curva Sud ka konfirmuar rikthimin e saj në stadium, duke premtuar një atmosferë elektrizuese që pritet të japë shtysë shtesë për kuqezinjtë.
Lëvizjet kryesore taktike
Plani i Allegrit (Milan):
Allegri pritet të shfrytëzojë krahët, me Santiago Gimenez dhe Christian Pulisic që do të alternohen në qendër për të hapur hapësira. Kjo lëvizje mund t’i krijojë terren Adrien Rabiot për depërtime të rrezikshme drejt zonës.
Plani i Contes (Napoli):
Conte do të fokusohet më shumë në të djathtën, ku Matteo Politano do të ketë detyrën të furnizojë me topa Rasmus Hojlund në qendër, ose të gjejë Scott McTominay në shtyllën e largët.
Një mbrëmje me shumë pritshmëri
Të dy trajnerët njihen për disiplinën dhe përgatitjen taktike, ndaj përballja e tyre pritet të vendoset në detaje. Me tifozët që do të krijojnë një atmosferë të zjarrtë, ndeshja Milan–Napoli është e destinuar të jetë një nga momentet kulmore të javës në Serie A. /ORAinfo/
