Antonio Cassano ka shpërthyer sërish me kritikat e tij, këtë herë ndaj Massimiliano Allegri-t dhe Milanit. Pas fitores së kuqezinjve ndaj Napolit, atmosfera është entuziaste në kampin kuqezi, por “FantAntonio” nuk mendon se skuadra e ka merituar suksesin.
“Allegri ka thënë një gënjeshtër. Dhe po jua them unë, që nuk kam nevojë të fitoj para sepse i kam. Milani me Napolin nuk e meritonte fitoren, golat erdhën nga gabime të mëdha të mbrojtjes. Për 60 minuta panë vetëm tri kundërsulme dhe dy gola. Nuk mund të jetë kjo ide e lojës”, – tha Cassano për ‘Viva El Futbol’.
Ish-sulmuesi i Romës dhe Real Madridit e pranon se nuk ka armiqësi personale me Allegri-n, por nuk e kursen gjuhën e ashpër: “Nuk kam pasur kurrë probleme me të, por kur skuadrat e tij luajnë keq, unë duhet ta them. Nuk më paguan askush, nuk jam skllav i askujt. Nëse e takoj, i them: ‘Mister, fiton, por lojën e bën m…’”.
Cassano shprehet se të vetmit lojtarë që po mbajnë Milanin janë Luka Modric dhe Christian Pulisic. “Modric mund të luajë deri në 55 vjeç, është ai që vendos gjithçka. Edhe Pulisic po bën diferencën, por Allegri e sheh si lojtar stoli. Kur të kthehet Leao, nuk e di nëse do të luajë”.
Sipas tij, perceptimi se Milani po zhvillon një futboll të bukur është i gabuar: “Është çmenduri të thuhet se Milani ka ndryshuar. Unë nuk shoh ide, vetëm humbje kohe. Në plan afatgjatë, besoj se do të shfaqet vlera reale e Allegri-t dhe e skuadrës. Për mua, Milani do ta ketë të vështirë të futet mes katër të parëve”.
