Edon Zhegrova vazhdon të mbetet jashtë fushës dhe për rrjedhojë, nuk ishte ftuar as në humbjen ndaj Comos.
Anësori po përjeton një tjetër pengesë, ndërsa roli i tij në Kombëtaren e Kosovës tashmë bëhet më i qartë, ashtu si edhe fjalët e trajnerit Franco Foda: “Duhet ta trajtojmë me kujdes”, duke nënkuptuar se do të donte ta kishte më shumë në dispozicion për të mbajtur gjallë ëndrrat e skuadrës.
Por jo – as te Juventusi nuk do të jetë gati, ndonëse trajneri Igor Tudor fillimisht kishte planifikuar t’i jepte një shans si titullar në njërën nga tri ndeshjet e ardhshme.
Zhegrova nuk do të arrijë as për sfidën e madhe kundër Real Madridit të mërkurën mbrëma. Zyrtarisht, ai mungon për shkak të një dëmtimi në ijë që është përhapur edhe në pjesën e kofshës – një problem që e ka ndjekur që nga sezoni i kaluar, sidomos në gjysmën e dytë.
Transferimi te Juventusi duhej të ishte një rifillim për Zhegrovën – një mundësi për të kompensuar kohën e humbur dhe për ta shfrytëzuar plotësisht në fanellën bardhezi.
Një ndërprerje e madhe e internetit ka prekur dhjetëra faqe interneti, lojëra dhe aplikacione të njohura
Por tani prioriteti i tij ka ndryshuar: rikuperimi fizik. Ai po ndjek një program të posaçëm për forcimin e muskujve dhe shmangien e përsëritjes së dëmtimeve.
Deri më tani, Zhegrova ka regjistruar vetëm tre paraqitje, gjithsej 36 minuta lojë (pa përfshirë shtesën). Një impakt shumë i vogël, larg pritjeve të klubit dhe tifozëve, për të cilët Edoni shihej si një nga opsionet për ringritjen e skuadrës.
Kur do të rikthehet Zhegrova?
Përgjigjja do të mësohet vetëm në ditët në vijim, kur dhimbjet të qetësohen dhe gjendja e tij të vlerësohet më qartë.
Mediat italiane shtojnë se Zhegrova po ndien zhgënjim që po përballet sërish me të njëjtin problem që mendonte se e kishte lënë pas. Ai punoi intensivisht gjatë verës me trajnerët personalë për të arritur formën optimale, por te Juventusi fjala kyçe tani është durimi – një qasje që po zbatohet edhe me lojtarë të tjerë si Bremer e Cabal, të cilët kanë kaluar periudha të gjata jashtë fushës.
Në çdo rast, stafi teknik është i vetëdijshëm për një fakt të thjeshtë: ka një ndryshim të madh mes të pasurit Zhegrovën në fushë dhe mungesës së tij. Edhe në ato pak minuta që ka luajtur, ai e ka treguar këtë.
