“Isha shumë i qartë. Mos më pyet më kurrë për diçka të tillë. Unë tashmë i kam shpjeguar arsyet e mia dhe i mbështes ato.”
Kështu iu përgjigj Max Verstappen nëpërmjet radios drejtuesve të Red Bull në fund të garës së Brazilit në vitin 2022, që i kërkonin holandezit t’i lëshonte vendin e gjashtë shokut të skuadrës Sergio Perez (asokohe luftonte me Leclerc për vendin e dytë në Botëror).
Në një intervistë të kohëve të fundit me gazetën zvicerane “Blick”, 4 herë kampioni i botës në Formula 1 theksoi pse, sipas mendimit të tij, një pilot duhet të jetë jashtëzakonisht i kujdesshëm kur përmbush çdo kërkesë nga ekipi.
“A do të kisha ngadalësuar siç bëri Piastri dy herë në 2025? Sigurisht që jo. Nëse e bën një herë pa një arsye të qartë, shet shpirtin tënd. Ekipi mund të bëjë çfarë të dojë me ty. Dhe të mos harrojmë se Piastri ishte në mes të luftës për titull”, tha Verstappen.
