Spalletti: Pres një Benfica agresive. Mourinho? Ne e respektojmë njëri-tjetrin

Liga e Kampionëve është rikthyer dhe Juventusi do të presë Benfican e José Mourinhos të mërkurën në mbrëmje. Është një ndeshje vendimtare për bardhezinjtë: nëse fitojnë kundër skuadrës portugeze dhe më pas kundër Monacos, lojtarët e Luciano Spalletti-t do të jenë në krye të listës së play off, por disa kombinime (të vështira) mund t’i lejojnë të kalojnë direkt në raundin e 16-shes.

“Kur luan kundër ekipeve si Benfica, po luan kundër një pjese të historisë së futbollit, një identiteti. Ekipet portugeze të fusin në ritmin e tyre dhe, nëse nuk je i kujdesshëm, të kap rrëmuja, dhe kur ta kuptosh, është tepër vonë. Pres që lojtarët tanë të jenë gati”, tha trajneri në një konferencë për shtyp.

Ndeshja e nesërme do të jetë gjithashtu midis Spallettit dhe Mourinhos: “Pata një përplasje në fillim me Josen, por më pas u rritëm duke e respektuar dhe vlerësuar njëri-tjetrin. Do të jetë kënaqësi ta takojmë përsëri, në ndeshjet ku është Mourinho, volumi i futbollit rritet. Për mua, të qenit në stolin tjetër është një burim krenarie”.

“Ne gjithmonë presim diçka të ndryshme kundër tij, është një ndeshje e rëndësishme për ne dhe për ta, është një përplasje e drejtpërdrejtë. Pres që Benfica të jetë agresive, ata do të detyrohen, ashtu si ne, të krijojnë identitetin e tyre në ndeshje. Jam i bindur se do të jetë një ndeshje interesante”.

Lidhur me Benfican, Spalletti shtoi më pas: “Imagjinoni mua duke analizuar një ekip të Mourinhos. Ata mund të konkurrojnë kundër kujtdo. Jam i përqendruar në atë që duhet të bëjë Juve. Futbolli portugez është një stil futbolli që të gjithëve gjithmonë u ka pëlqyer sepse përpiqesh ta bësh topin të lëvizë sa më shpejt të jetë e mundur”.