“Një për të gjithë dhe të gjithë për një, Haaland ka nevojë për mbështetjen e skuadrës që të shënojë”
Trajneri i Manchester City, Pep Guardiola, i ka fajësuar shokët e ekipit të Erling Haaland për mungesën e papritur të golave të sulmuesit. Gjithsesi, ai është i bindur se ylli norvegjez do të vazhdojë të shënojë për pjesën tjetër të jetës së tij.
Haaland ka shënuar vetëm një gol në nëntë ndeshjet e tij të fundit, një penallti. Përpara kësaj, ai kishte shënuar 38 gola në 28 ndeshje në të gjitha garat, në atë që ai e përshkroi si formën më të mirë të karrierës së tij.
Kur u pyet se çfarë fshihej pas vështirësive të fundit të Haaland para portës, Guardiola u përgjigj se ishte “ekipi”. City mund të ketë nevojë që Haaland të rifitojë qetësinë e tij të fillimit të sezonit në ndeshjen në shtëpi kundër turqve.
“Nëse Haaland nuk mbështetet sa duhet ai e ka të vështirë të shënojë i vetëm. Një për të gjithë dhe të gjithë për një, kjo është motoja”, u shpreh trajneri spanjoll.
“Këtu e meritojmë të jemi“, tha Guardiola, i cili do të jetë pa disa lojtarë kyç për ndeshjen. Rodri është i pezulluar, mbrojtësit qendrorë Ruben Dias, Josko Gvardiol dhe John Stones janë të lënduar dhe afrimet e janarit Antoine Semenyo dhe Marc Guehi nuk mund të luajnë në këtë fazë të garës.
