Ajo që përflitej prej kohësh, u zyrtarizua gjatë ditës së sotme. Antoine Griezmann do të largohet në fund të këtij sezoni nga Atletico Madrid, një vit para përfundimit të kontratës dhe do të luajë në MLS, tek Orlando City.
Klubi amerikan e kërkoi sulmuesin francez që tani, pasi në MLS merkato mbyllet në fund të marsit, por Atletico refuzoi, duke pranuar largimin e lojtarit vetëm në fund të sezonit.
Ndërkohë, mediet spanjolle zbulojnë se “Colchoneros” kanë piketuar që tani zëvendësuesin ideal të Griezmann. Bëhet fjalë për Omar Marmoush, sulmuesin egjiptian të Manchester City, i cili nuk është një titullar i rregullt te “Qyetetarët” dhe duket se është gati për një aventurë të re.
Sipas raportimeve të ndryshme, oferta e parë e Atletico Madridit përflitet se do të jetë në shifrën 50 milionë euro. Kujtojmë se egjitpiani u transferua te City në merkaton dimërore të vitit 2025, për shifrën 75 milionë euro. Këtë sezon, Marmoush ka luajtur rreth 1100 minuta në të gjitha kompeticionet dhe ka shënuar 6 gola, si dhe ka dhënë 3 asiste.
