Manuel Akanji është një nga liderët e Interit, një nga lojtarët që Cristian Chivu do t’i kërkojë të udhëheqë skuadrën zikaltër në këtë moment delikat të sezonit dhe të qëndrojnë të distancuar karshi rivalëve në krye të Serie A. “Jemi të fokusuar te vetja, nuk mendojmë për të tjerët dhe nuk kemi frikë nga askush. Duhet të fitojmë ndeshjet tona dhe, nëse ndodh, do të jemi kampionë”, – tha Akanji në një intervistë ekskluzive për “Sportmediaset”.
Ai shtoi: “Duam të fitojmë titullin e Serie A dhe Kupën e Italisë. Në kampionat jemi në vend të parë, me 6 pikë avantazh, duam të qëndrojmë në krye deri në fund të sezonit. Ndërsa në Kupë shpresojmë të arrijmë në finale duke mundur Comon, për ta ngritur më pas trofeun”.
Fjalët e Akanji tregojnë qartësinë dhe ambicien e Interit për ta mbyllur sezonin me tituj, duke mos u trembur nga presioni, por përqendruar energjitë vetëm te performanca në fushë.
