Hansi Flick dhe Barcelona do ta vazhdojnë bashkëpunimin të paktën edhe dy vite të tjera. Trajneri, kontrata aktuale e të cilit përfundon në qershor 2027, ka pranuar ofertën e fundit për rinovim. Fillimisht, klubi i drejtuar nga Joan Laporta synonte një marrëveshje deri më 2029, por gjermani preferoi kontratë më të shkurtër.
Megjithëse disa detaje mbeten për t’u diskutuar, ato do të sqarohen javën e ardhshme kur agjenti Pini Zahavi të mbërrijë në Barcelonë, edhe për të diskutuar të ardhmen e Lewandowski. Flick ka dhënë miratimin për kontratë deri më 2028, me një vit opsional që aktivizohet automatikisht nëse palët bien dakord në fund të sezonit 2027-28.
Ai do të firmosë kontratën e re pasi Barça të shpallet kampione e La Liga-s, qoftë këtë fundjavë apo pas “El Clásico” së 10 majit. Me këtë, Flick do të arrijë 5 trofe në dy sezonet e para, përfshirë tripletën kombëtare në debutim. Gjithashtu, ai ka nxjerrë maksimumin nga një skuadër e re, duke debutuar 12 lojtarë nga akademia dhe rikthyer në formë futbollistë si Raphinha dhe Eric Garcia.
