Numri 1 i botës ka komentuar çështjen financiare të turneve Slam, ku shpërblimet konsiderohen shumë të ulëta nga protagonistët e këtij sporti, meshkujt dhe femrat.
“Kam përshtypjen se spektakli varet nga ne. Pa ne nuk do të kishte turne dhe nuk do të ishte ky lloj argëtimi. Meritojmë një përqindje përfitimi financiar më të lartë. Shpresoj vërtet që bisedimet të na çojnë herët a vonë në vendimin e duhur. Në një konkluzion që të kënaqë të gjitha palët. Në një moment të caktuar mund të bojkotojmë; është e vetmja mënyrë për të luftuar për të drejtat tona”.
Kjo është deklarata e Aryna Sabalenka, numrit 1 në botë në tenisin e femrave, gjatë një konferencë shtypi në Itali. Ajo ka prekur temën e shpërblimeve të ofruara nga Roland Garros, Slam-i i dytë sezonal.
Organizatorët kanë bërë me dije se ka një rritje prej 9.5% të shpërblimeve për 2026-ën, duke kapur shifrën 61.7 milionë euro. Fituesit e turneut do të marrin 2.8 milionë euro, një kuotë ende e pamjaftueshme sipas lojtarëve, duke parë rritjen e të ardhurave.
Për Iga Swiatek bojkoti është “një situatë pak ekstreme”, kurse propozimi i tenistëve, që parashikon rritjen e shpërblimeve për të gjithë turnetë në 22%, është “mjaft i arsyeshëm”.
