Angelo Di Livio ka folur për Juventusin dhe atë që, sipas tij, i mungon skuadrës bardhezi për të arritur Interin. Në një intervistë për podcastin e Tuttosport, ai theksoi se bardhezinjtë kanë nevojë për më shumë lojtarë me karizëm dhe personalitet: “Te Juventusi mungojnë lojtarët pak më karizmatikë, nuk janë më si dikur, kur dominonim në Itali”.
Sa i përket merkatos, Di Livio përmendi Bernardo Silva si përforcimin ideal: “Do ta merrja menjëherë, edhe në këmbë”. Sipas tij, portugezi do të sillte personalitet dhe siguri në momentet e vështira, njësoj si ndikimi që kanë pasur lojtarë të mëdhenj te Milani (Modrić dhe Rabiot). Për Luciano Spallettin, ai e krahasoi me Marcello Lippin: “Janë të dy fitues”.
Di Livio foli edhe për akuzat ndaj Juventusit: “Kur je aty kupton që nuk je i mbrojtur nga askush”. Ai kujtoi edhe humbjen e titujve të figurave si Buffon, Del Piero, Nedvěd dhe Cannavaro, duke theksuar se për ta mentaliteti ishte i qartë: “Flisni sa të doni, ne mendojmë vetëm të fitojmë”.
