Te Milani vazhdon kontestimi i tifozëve të organizuar, pas nisjes së revolucionit nga Gerry Cardinale. Gjatë natës janë vendosur sërish banera pranë “San Siro”, ku shënjestra kryesore është Zlatan Ibrahimovic, që pritet të jetë figura kyçe e epokës së re.
Në një prej tyre shkruhej: “Ibra e keqja absolute, Allegri dhe Tare burrat e vetëm të vërtetë”. Ish-drejtori sportiv dhe ish-trajneri mbrohen sërish nga tifozët, si më 10 maj para Milan–Atalanta, por tashmë të dy janë shkarkuar. Protesta vazhdon edhe kundër Cardinale, ndërsa nuk kursehen as Maignan dhe shokët e tij pas humbjes me Cagliari, të fishkëllyer me “Lojtarët dhe klubi, të gjithë fajtorë”.
Ndërkohë bie në sy mungesa e çdo mesazhi lamtumire nga lojtarët e Milanit për Massimiliano Allegri pas shkarkimit, përfshirë Gabbia, Maignan, Rabiot dhe Luka Modrić, i cili pak ditë më parë e kishte lavdëruar publikisht.
