Katër skuadra të Abissnet Superiore mësojnë sot emrat e kundërshtarëve të tureve të para kualifikuese në kompeticionet europiane: Egnatia në Champions League dhe Vllaznia, Dinamo dhe Elbasani në Conference League.
Shorti do të hidhet gjatë pasdites dhe 4 skuadrat shqiptare shpresojnë të kenë pak fat për të “peshkuar” kundërshtarë të lehtë, për të pasur mundësi kualifikimi për në turin e dytë.
Mund të kemi edhe ndonjë përballje shqiptarësh, pasi kundërshtarë mund të jenë ekipe si Ballkani, Shkëndija e Tetovës, apo edhe Deçiç i Malit të Zi.
Egnatia kampione ka avantazhin që nëse eliminohet nga Champions League, mund të zbresë në Conferencë League, duke e vazhduar aventurën europiane. Në Conference League, vetëm Vllaznia është në vazon e favoritëve, kurse Dinamo dhe Elbasani në atë të jo favoritëve.
