Trajneri i Dinamos, Ilir Daja ka dalë në një konferencë për shtyp në prag të ndeshjes me Astanën për turin e parë kualifikues të Conference League, e enjte, ora 21:00.
“E dimë që përballë do të kemi një ekip me goxha eksperiencë jo vetëm në Kazakistan, ku ka fituar tituj, por edhe në Europë. Dihet që Astana ka prezantime edhe në grupet e Champions League, ka prezantime dhe në Europa League e Conference League”.
“Ata janë në javën e 17-të të kampionatit dhe janë në ritmin maksimal të tyre. E treta, por jo nga rëndësia, është se trajneri e njeh mirë ekipin, ka disa vite që punon me të dhe ka një manovër të konsoliduar”.
“Nuk do të ndikohemi nga këto që thashë, do të bëjmë maksimumin tonë. Do respektojmë kundështarin, por më shumë do respektojmë veten. Do të mundohemi të gjejmë strategjinë e duhur për të marrë maksimumin nga ndeshja e nesërme”.
“Kam kërkuar nga lojtarët me eksperiencë që të japin më shumë nga vetja. Jam trajner optimist, që e shoh gotën gjysmë plot. Pozitive për ne është se është viti i dytë radhazi që luajmë në Europë, sezonin e kaluar shkuam deri në Play off”.
“Kualifikimi vendoset pas 180 minutash dhe ne do të mendojmë jo vetëm për të sulmuar, por edhe të jemi në ekuilibër për të mos i dhënë mundësi kundërshtarit”.
