Boksieri britanik Anthony Joshua ka deklaruar se i gjithë fokusi i tij është te përballja me Kristian Prengën, duke refuzuar të flasë për një duel të mundshëm me Tyson Fury.
Joshua do të rikthehet në ring të shtunën në Xhedah të Arabisë Saudite, ku do të përballet me boksierin shqiptar Kristian Prenga. Ky duel konsiderohet si një ndeshje e rëndësishme përpara një sfide të mundshme mes dy ish-kampionëve të botës në peshën e rëndë, Joshua dhe Fury.
Në konferencën për media para ndeshjes, Joshua kërkoi respekt për kundërshtarin e tij dhe tha se nuk dëshiron të shpërqendrohet nga spekulimet për të ardhmen.
“Respektoni kundërshtarin tim. Nuk duam të flasim për Tyson Fury. Kam folur mjaftueshëm për atë që mund të sjellë e ardhmja, por fokusi ynë është te Prenga dhe ekipi i tij”, deklaroi Joshua.
Ai theksoi se është përgatitur intensivisht që nga muaji janar dhe se synimi i vetëm është fitorja në duelin e së shtunës.
“E kuptoj se ekziston një panoramë më e madhe, por fillimisht duhet të kaloj këtë sfidë. Objektivi im është këtu”, shtoi boksieri britanik.
Promotori Eddie Hearn ka arritur ndërkohë një marrëveshje paraprake me kampin e Tyson Fury për një duel të shumëpritur, por ai pritet të realizohet vetëm nëse Joshua kalon me sukses sfidën ndaj Prengës.
“Kur flasim për atë që mund të vijë më pas, është një mundësi e madhe, por realiteti është se nuk ka të ardhme nëse nuk e kaloj këtë pengesë të shtunën mbrëma”, përfundoi Joshua.
Për Joshua, kjo do të jetë ndeshja e parë profesionale që nga aksidenti automobilistik në Nigeri në dhjetor të vitit të kaluar, ku humbën jetën dy miq të tij të ngushtë, Latif “Latz” Ayodele dhe Sina Ghami. Pas tragjedisë kishte dyshime nëse ai do të rikthehej më në ring.
