Ruben Amorim foli para debutimit të tij në “San Siro” në krye të Milanit, të planifikuar për të premten në mbrëmje, në orën 20:45, kundër Venezias.
Trajneri i kuqezinjve shfaqi energjinë e tij karakteristike, duke folur hapur dhe qartë për një sërë temash – që nga lojtarët e rinj dhe merkatoja, e deri te Leao dhe lojtarët e përjashtuar nga skuadra.
“Duhet të krijojmë mekanizma brenda skuadrës dhe ta përgatisim atë në mënyrë që gjithsecili të mund të përshtatet e të luajë. Do të jetë e pamundur të aktivizojmë të njëjtin formacion çdo herë; ne duam të fitojmë tituj dhe kjo kërkon rotacion të lojtarëve, në varësi të kundërshtarit specifik. Na duhet një gamë e larmishme cilësish për t’u përballur me çdo kundërshtar dhe duhet të sigurohemi që të gjithë lojtarët të jenë gati, ndaj rotacioni është thelbësor.
Siç e kam thënë tashmë në konferencën e parë për shtyp, jam shumë i kënaqur; nuk e di se çfarë do të ndodhë nga tani e deri në fund të merkatos. Nëse vjen ndonjë lojtar, do të jetë sepse ai mund të na ndihmojë si në të tashmen, ashtu edhe në të ardhmen.
Leao nuk do të jetë në skuadër sepse është stërvitur vetëm një herë. Kanë mbetur edhe pesë ditë nga mbyllja e merkatos; mund të flasim atëherë. Leao është një lojtar shumë i talentuar; me mentalitetin e duhur, ai mund të luante për çdo skuadër, por vijnë momente në jetë kur ndoshta duhet të luash diku tjetër”, ka thënë mes të tjerash trajneri i Milanit.
