Gara për “Topin e Artë” të vitit 2026 po hyn në fazën e saj vendimtare dhe, me përfundimin e votimit, favoriti ka ndryshuar sërish. Lamine Yamal ka parakaluar Harry Kane në kuotat e bastvënësve, duke përmbysur parashikimet që deri pak ditë më parë e shihnin sulmuesin e Bayern Munich si kandidatin kryesor.
100 gazetarët e përzgjedhur nga “France Football” për votimin përfundimtar, një nga secili shtet që renditet në 100 vendet e para të klasifikimit të FIFA, tashmë i kanë hedhur votat e tyre.
Megjithatë, fituesi nuk do të zbulohet deri më 26 tetor, kur çmimi të dorëzohet në një ceremoni në Londër. Sipas kuotave të raportuara nga Polymarket, spanjolli kampion bote tani ka 45% mundësi për të fituar trofeun, krahasuar me 42% për Kane. Të dy lojtarët po garojnë për “Topin e Artë” të parë në karrierën e tyre.
Sulmuesi anglez konsiderohej favoriti kryesor në javët e fundit, falë një sezoni të jashtëzakonshëm në të cilin shënoi 73 gola, shifra e dytë më e lartë në historinë e këtij sporti.
Megjithatë, vetë Kane kishte qëndruar modest: “Nuk më ka pëlqyer kurrë të flas shumë për veten. Sezoni i kaluar ishte i jashtëzakonshëm, si në aspektin personal ashtu edhe për ekipin,” deklaroi ai.
Nga ana tjetër, Yamal ka theksuar vazhdimisht shanset e tij, i mbështetur nga trajneri Hansi Flick, bashkëlojtarët dhe agjenti i tij, Jorge Mendes. “Besoj sinqerisht se e meritoj këtë vit për shkak të asaj që kam fituar: La Liga dhe Kupën e Botës,” shpjegoi talenti i ri i Barcelonës, duke theksuar gjithashtu stilin e tij të lojës si një faktor kyç dallues.
