Topa që bien nga qielli dhe ulen në tokë me një prekje që nuk duket njerëzore… Në të njëjtin çast, artisti i veshur si futbollist kalon kundërshtarin që i është ngjitur pas. Kontrolli i orientuar, teknika, driblimi vdekjeprurës, goditjet e sakta të dënimit, gjuajtjet e fuqishme e precize dhe loja me kokë…; Zinedine Zidane është i gjithi ky repertor.
Italianët e njohën më 19 mars 1996, kur me Bordeaux shkatërroi Milanin në Kupën UEFA. Më pas Juventusi e bleu dhe, pas një fillimi jo të shkëlqyer, një gol i madh ndaj Interit në tetor e nisi drejt titullit të vitit 1997. Më vonë erdhi Real Madridi, me ruletat, driblimet, kontrollet fantastike dhe asistet vizionare.
Me Francën, Zidane i ndëshkoi italianët në çerekfinalen e Botërorit 1998 dhe në finalen e “Euro 2000”. Hakmarrja erdhi më 2006, por me një fund të hidhur për të: përjashtimi me karton të kuq pas përplasjes me Materazzi dhe largimi pranë trofeut të Botërorit.
Si trajner, fitoi tre Champions League radhazi me Real Madridin, më pas një La Liga, ndërsa tani rikthehet për të drejtuar Francën. Na vjen mirë të të shohim sërish, Zizou. “Poezia” jote do të mbetet gjithmonë me ne, por tani është koha për prozën dhe pikët…
