Prokuroria e Posaçme vijon veprimet procedurale në kuadër të dosjes “Balluku”. Gazetarja Lusi Përgjegji raportoi për RTSH se këtë të mërkurë është paraqitur në ambientet e SPAK ish-drejtori i KESH, Erald Elezi, i cili është thirrur nga oficerët e BKH-së për të dhënë sqarime në lidhje me hetimet.
Elezi, i marrë i pandehur në këtë dosje, është nën masën e sigurisë “detyrim për paraqitje”. Hetimet lidhen, ndër të tjera, me procedurat e tenderimit për Tunelin e Llogarasë dhe Lotin 4 të Unazës së Madhe.
Ndërkohë, rreth orës 14:00 është thirrur për të dhënë deklarime shtesë edhe ish-drejtori i ARRSH-së, Gentian Gjyli, i cili gjithashtu është marrë i pandehur në kuadër të së njëjtës çështje.
Të dy ish-drejtuesit janë nën hetim për shkelje të barazisë së pjesëmarrësve në tendera, ndërsa SPAK vijon me veprimet hetimore në dosjen ku është e pandehur edhe ish-zëvendëskryeministrja Belinda Balluku.
Pritet të shihet nëse në listën e personave që do të thirren për të dhënë deklarime do të jetë edhe Balluku, e cila akuzohet për shkelje të barazisë në tenderin e Tunelit të Llogarasë dhe po hetohet edhe për procedura të tjera tenderuese.
