Interi pëson humbjen e dytë radhazi në Champions League. Pas disfatës ndaj Real Madridit në “Bernabeu”, skuadra e Cristian Chivu u mposht papritur 4-3 nga Club Brugge në “San Siro”.
“Pjesa e parë ishte e mirë dhe intensive nga të dyja skuadrat. Pësuam një kundërsulm që solli penalltinë dhe golin, por reaguam mirë. Më pas patëm dy raste të rëndësishme, pa arritur të shënonim. Frustrimi dhe nxitimi na bënë të humbnim ekuilibrin. Pas rezultatit 2-1, dolëm nga loja jonë dhe nuk iu përmbajtëm planit. Duhet vlerësuar edhe intensiteti i Club Brugge, që na vuri shumë në vështirësi”, – deklaroi Chivu.
A ka gjëra për t’u korrigjuar: “Patjetër. Duhet të rivlerësojmë disa gjëra, sidomos në Champions, ku është e vështirë të rikuperosh kur je në disavantazh. Duhet të përmirësojmë ekuilibrin, duelet, topat e dytë dhe distancat mes lojtarëve.
E marr unë përgjegjësinë, sepse nuk po arrij të gjej ekuilibrin e duhur në disa ndeshje. Duhet të ruajmë besimin, pasi na kanë mbetur edhe 6 ndeshje. Këto dy humbje dhembin, sepse pritshmëritë ishin të tjera. Duhet të punojmë shumë, si taktikisht, ashtu edhe mendërisht”.
