Mikel Arteta e vlerësoi paraqitjen e Arsenal pas fitores 1-0 në transfertë ndaj Nottingham Forest. Ky është një rezultat që i ndihmon “topçinjtë” të konsolidojnë një nisje të fortë në Premier League, duke siguruar 18 pikë nga 21 të mundshme në shtatë ndeshjet e para, duke qëndruar në vendin e dytë, pas Manchester City.
Ndeshja nuk ishte aspak e lehtë për ekipin londinez, i cili në dy vizitat e mëparshme në “City Ground” kishte barazuar pa gola. Nottingham Forest tregoi sërish qëndrueshmëri në mbrojtje, duke e detyruar Arsenal të luante me durim, një përballje që u vendos në minutën e 80-të nga një gol i Noni Madueke.
“Një fitore e madhe. Nuk kishim arritur ta bënim këtë në dy sezonet e fundit në një fushë shumë të vështirë. E dinim se fati i ndeshjes do të varej nga detaje të vogla. Është një ekip jashtëzakonisht i vështirë për t’u thyer, pothuajse gjithçka duhet të jetë e përsosur”, shpjegoi Arteta.
“Në pjesën e dytë, na u desh të luanim një lojë krejtësisht ndryshe, duke shtuar kërcënimin në sulm, por duke mbetur të qetë dhe të disiplinuar, për të mos lënë asnjë hapësirë. Ishim të bindur se, herët a vonë, do të gjenim mënyrën për të çarë murin e tyre. Lojtarët që hynë nga stoli ishin vendimtarë“, shtoi spanjolli.
