E ardhmja e portierit të Real Madridit me “Djajtë e Kuq” mbetet e paqartë. Courtois zbulon se është përjashtuar nga grupi i lojtarëve në WhatsApp, por thekson se nuk kërkon garanci për vendin e titullarit.
E ardhmja e tij me kombëtaren belge vazhdon të jetë në pikëpyetje. Pas Botërorit 2026, portieri i Real Madridit dukej i prirur t’i jepte fund aventurës me “Djajtë e Kuq”, por javët e fundit kishte ndryshuar qëndrim, duke u shprehur i gatshëm të rikthehej.
Megjithatë, mungesa e tij në grumbullimet e fundit të kombëtares ka ngritur pikëpyetje të reja. Situata është ndërlikuar edhe më shumë pas një episodi të zbuluar nga vetë portieri në një intervistë për DAZN: “Më kanë hequr nga grupi i lojtarëve. Ai shërben për të komunikuar informacione, si për shembull për stërvitjet. Herë pas here ka edhe mesazhe të tjera, por jo shumë”.
Portieri 34-vjeçar, i cili ka regjistruar 115 ndeshje dhe ka marrë pjesë në katër edicione të Kupës së Botës me Belgjikën, theksoi se nuk kërkon asnjë privilegj dhe asnjë garanci për të qenë titullar: “Askush nuk duhet të ma garantojë vendin. Nuk kam shkuar kurrë në kombëtare duke menduar se do të luaja automatikisht. I njoh cilësitë e mia dhe e di se mund të jem i rëndësishëm, por nëse trajneri preferon portierë të tjerë, nuk ka asnjë problem.”
Në qendër të kësaj situate është drejtimi i ri i kombëtares belge, nën drejtimin e Mark van Bommel, i cili në grumbullimet e fundit ka preferuar futbollistë më të rinj. Pavarësisht momentit delikat, Courtois vlerësoi punën e trajnerit holandez dhe shprehu besimin se Belgjika ka perspektivë të mirë: “Skuadra po ecën në drejtimin e duhur, ashtu si edhe trajneri. Kjo kombëtare ka një të ardhme të madhe”.
