Një 49-vjeçar me precedentë të theksuar për krime kundër jetës dhe armëmbajtje pa leje është arrestuar nga Policia e Tiranës, pasi u kap duke lëvizur me motomjet dhe duke transportuar një armë zjarri me municion.
Gjatë operacionit u sekuestruan gjithashtu një jelek antiplumb, motomjeti dhe telefoni celular i të dyshuarit.
Operacioni policor i koduar “Eksponenti” u finalizua nga specialistët e Seksionit për Hetimin e Trafiqeve, në bashkëpunim me shërbimet e Forcës së Posaçme “Shqiponja”, pas administrimit të informacionit të siguruar në rrugë operative.
Në kuadër të këtij operacioni u arrestua në flagrancë shtetasi E.D., 49 vjeç, banues në Tiranë.
Sipas Policisë, motomjeti me të cilin lëvizte 49-vjeçari u ndalua për kontroll në Rrugën e Elbasanit. Gjatë kontrollit, efektivët gjetën një armë zjarri pistoletë me municion, të cilën dyshohet se ai kishte për qëllim ta trafikonte.
Hetimet vijuan më pas me kontrollin e banesës së të arrestuarit, ku u gjet dhe u sekuestrua një jelek antiplumb.
Po ashtu, si prova materiale u sekuestruan arma e zjarrit me municion, motomjeti me të cilin lëvizte 49-vjeçari dhe telefoni i tij celular.
Materialet procedurale i janë referuar Prokurorisë për veprime të mëtejshme hetimore, ndërsa vijojnë verifikimet për të dokumentuar plotësisht aktivitetin kriminal të të arrestuarit dhe destinacionin e armës së sekuestruar.
/rtsh.al/
