Interi arriti të bënte një sezon deri diku të suksesshëm duke arritur në finalen e Ligës së Kampioneve. Zikaltërit do të përballen me Mançester Sitin në finale, në një ndeshje ku diferencat në letër janë shumë të mëdha.
Drejt Stambollit do të udhëtojnë me mijëra tifozë por të shumtë janë edhe ato që nuk do të kenë mundësi ta ndjekin ndeshjen në stadium. Për këtë, Interi ka vendosur të hapë dyert e “San Siros” ku do të vendoset një ekran gjigand për të transmetuar takimin, sipërfaqja e të cilit arrin në 400 metra katror.
Ky ekran gjigand do të vendoset në unazën e dytë të pjesës portokalli të tribunës, teksa pjesa tjetër e stadiumit do të jetë e mbushur me tifozë. Sakaq, janë publikuar edhe çmimet e biletave për të parë ndeshjen në San Siro dhe janë ndarë në 3 kategori.
Bileta më e shtrenjtë kushton 20 euro, ndërkohë që kategoria e dytë ka çmimin 14 euro. Kategoria e fundit që është në unazën e tretë, ka çmimin 10 euro.
PANORAMASPORT.AL
