Duket se Sandro Tonali shumë shpejtë do të jetë një futbollist i Njukasëllit, me Milanin që është gati të pranojë ofertën prej 80 milionë eurosh për të.
Gjithsesi duket se mesfushori italian është “tradhtuar” nga klubi i tij i zemrës, pasi nuk donte të largohej pavarësisht ofertave.
Kjo është ajo që raporton gazetari i njohur i Milanit, Alesandro Skiavone, i cili shpjegon trekëndëshin Milan-Tonali-Njukasëll.
“Përpara se të nisej me kombëtaren për Europioanin U-21, lojtari i tha klubit se donte të qëndronte pavarësisht çdo gjëje. Njukasëlli prej ditësh kishte shfaqur interes për të dhe i ofroi trefishin e pagës që merrte te Milani. Gjithsesi lojtari refuzoi sërish, pavarësisht Premier Ligës dhe projektit të madh që kishte klubi. Milani i tha agjentit të Tonalit se donin ta shisnin. Ky i fundit, i shokuar nga vendimi i Milanit, duket se ka ndryshuar mendje, me Kardinalen që është i gatshëm ta lërë të lirë. Tani çdo gjë varet nga Njukasëlli që do të bisedojë detajet e fundit me Milanin, që nuk duket se ka probleme”, shkruan Skiavone.
PANORAMASPORT.AL
