Gazeta “Marca” ka zbuluar listën e 100 futbollistëve më të mirë të sezonit 2022-‘23, ndërsa votat maksimale i ka marrë sulmuesi i Mançester Sitit, Erling Haland. 
Një juri e përbërë nga më shumë se 115 ish-futbollistë, gazetarë, analistë, ish-trajnerë dhe 10 mijë tifozë nga e gjitha bota, votuan për më të mirët e sezonit të fundit. Vinicius, Haland, De Bryjne, Mesi, Mbape e shumë emra të tjerë dominojnë renditjen speciale. Por askush nuk grumbulloi më shumë pikë sesa Haland. Sulmuesi norvegjez mori 5631 pikë, duke lënë pas Mesin dhe Viniciusin.
Në ambientet e klubit të Sitit fituesi i tripletës në sezonin e tij të parë në Angli mori trofeun “Marca” në prani të shokëve të tij dhe u shpreh se ky çmim e motivon që të jetë edhe më ambicioz në të ardhmen: “Faleminderit shumë, do të vazhdoj të shtyj përpara”. Ai e mbylli sezonin duke ngritur të gjithë trofetë e mundshëm dhe duke shënuar 52 gola në 53 ndeshjet zyrtare të luajtura me klubin gjatë sezonit 2022-‘23, sa asnjë lojtar tjetër në Europë.
Një makineri golash që është favorit për të fituar edhe çmimin e Lojtarit Më Të Mirë të UEFA-s dhe “Topin e Artë”.
“Ambicia ime e vetme është të fitoj gjithmonë ndeshjen e radhës”, thotë ndërsa kritikat e jashtme nuk e shqetësojnë: “Kur dikush më kritikon, përpiqem të buzëqesh. Asgjë nga këto nuk më prek. E vërteta është se nuk më pëlqen të flas shumë për veten time, nuk ndihem më i veçantë se askush. Kam ardhur te Siti për këtë, për të fituar trofe. Dhe po, mund të them se ka qenë sezoni im më i mirë. Por ne duhet të vazhdojmë të përmirësohemi. Ju falënderoj për çmimin. Më pëlqen shumë”.
I pranishëm gjatë ceremonisë ishte edhe trajneri Pep Guardiola, i cili tha për sulmuesin e tij: “Shpresojmë që të vazhdojë të njëjtën rrugë, sepse është një djalë i mirë dhe na ka ndihmuar shumë këtë sezon. Dëshira që ka për të mësuar është mbresëlënëse”. Futbollisti i parë spanjoll në listë është Rodrigo, një tjetër ylli i Sitit, të cilin Guardiola nuk nguron ta përsërisë se është mesfushori më i mirë në botë. Në listën e “Marca”-s ai zë vendin e gjashtë.
ANDROKLI DRALO-PANORAMASPORT.AL
