Lamtumira e Sandro Tonalit mbase do të jetë e fundit për këtë verë, por me siguri jo e fundit në historinë e Milanit. Teksa mesfushori do të paguhet thuajse 10 milionë në sezon, klubi do të arkëtojë 80 milionë.
Sidoqoftë, ndër vite, klubit dhe sidomos tifozëve, u është dashur të shohin beniaminë që largohen. Disa mbyllin karrierën, të tjerë nuk dëshirohen e të tjerë akoma shiten. Më poshtë, po ju servirim disa nga “lamtumirat” më të bujshme të Milanit.
IBRA E TIAGO – Ashtu si Tonali, edhe Zlatan Ibrahimoviç dhe Tiago Silva u detyruan të largoheshin. “Për të mirën e Milanit”, iu tha nga drejtuesit e kohës, ndërkohë që në arkat kuqezi përfunduan 65 milionë euro. Edhe lojtarët kërkuan yjet për të ndaluar transferimin, por në Paris sapo kishin mbërritur sheikët, të cilët nuk kurseheshin për asgjë.
4 SENATORË – 13 maji 2012 është një datë ikonike për milanistët. Sedorf, Inzagi, Gatuzo e Nesta paraqiten për herë të fundit me fanellën e “djallit”. Vetëm “SuperPipo” ndaloi, të tjerët vijuan karrierat e tyre në, Brazil, Zvicër dhe Indi.
KAKA – Edhe Kaka u shit për arsye të ngjashme me ato të Tonalit. Lajmin e dha vetë braziliani, teksa ishte i grumbulluar me kombëtaren. Në arkat kuqezi 65 milionë euro që ndihmuan Galianin e Berluskonin të ruanin disi bilancet e klubit. Me të njëjtin qëllim u largua edhe Kaka duke sjellë miliona, por edhe shumë trishtim. Ai do të rikthehej te Milani në 2013, por kontrata dyvjeçare u ndërpre pas vetëm një sezoni.
SHEVA – Një tjetër thikë në zemrat milaniste ishte ajo që erdhi nga largimi i Andrij Shevçenkos, i cili zgjodhi Londrën për një përvojë ndryshe, por edhe për të ndihmuar fëmijët të mësonin anglishten, të cilën, me sa duket, nuk e kishin mësuar siç duhej nga mamaja e tyre amerikane. Milani përftonte 45 milionë euro, teksa vetë Berluskoni komentonte shitjen si pasojë e vullnetit të bashkëshortes së ukrainasit.
ALBERTINI – Më shumë se një dekadë si kuqezi dhe pesë tituj të shoqëruar me një Kupë Kampionesh e shumë trofe të tjerë. Ja që në verën e 2002- shit edhe një ikone si Demetrio Albertini iu desh të largohej nga Milanit. Huazim tek Atletiko e Madridit dhe shitje te Lacio për një mesfushor që mbase do të kishte merituar më shumë respekt.
LEGJENDA – Xhorxh Ueah, holandezët Gulit e Rajkard, pa harruar Saviçeviçin me Desainë janë të tjera shitje të bujshme të Milanit ndër vite. Herë arsye taktike e herë disiplinore, por me siguri që Sandro Tonali nuk është largimi i vetëm i dhimbshëm i përjetuar nga milanistët.
PANORAMASPORT.AL
