Interi po bëhet gati t’i japë lamtumirën Andre Onanas. Ofertat për gardianin e zikaltërve nuk mungojnë dhe Mançester Junajtid është pranë arritjes së një akordi me italianët për transferimin e tij gjatë merkatos së verës.
Kjo ka shtyrë klubin që të mendojë për të ardhmen dhe tashmë duket se Marota ka piketuar emrat që mund të zënë vendin e kamerunasit. Jan Zomer, portieri zviceran i Bajern Mynih, është një nga opsionet, pasi kthimi i Manuel Nojer te bavarezët do ta linte atë jashtë planeve të skuadrës.
Por opsioni i parë quhet Hugo Loris. Portieri francez, i cili e mbylli me përfaqësuesen e “gjelave” pas përfundimit të Botërorit 2022, duke u larguar me një titull kampion bote të fituar në vitin 2018, raportohet se është në bisedime intensive me zikaltrit. “L’Equipe” raporton se bisedimet mes palëve pritet të shtohen në ditët në vijim, pasi Interi është shumë i interesuar për portierin 36-vjeçar të Totenhem dhe është gati të firmosë me të në momentin që Onana do të transferohet në klubin e ri.
PANORAMASPORT.AL