Përpara zbarkimit të trajnerit Mauricio Poçetino pak ditë më parë, ishte një çmenduri për të që të shihte listën e lojtarëve të skuadrës së parë që kishte në dispozicion 38 të tillë dhe nuk dihet nëse deri në fund të kësaj merkatoje mund të shesin të paktën gjysmën e tyre dhe të bëjnë ndonjë blerje tjetër, për të arritur te normalja e 25-26 futbollistëve.
Blutë e Londrës kanë fluturuar drejt SHBA në fillim të javës, ku do të përgatiten për sezonin e ardhshëm, me disa miqësore luksi që e presin. Ideja e Poçetinos për këto sfida është jo vetëm që të krijojë një ide loje, por shpreson që disa të cilët janë jashtë listës së tij të gjejnë një klub që t’i blejnë, pasi te blutë ka vërtet shumë trafik. Deri tani kanë përshëndetur 10 lojtarë:
Azpilikueta, Kulibali, Mendi, Kovaçic, Haverc, Loftus-Çik, Pulisiç, Feliks e Maunt, ndërsa Lukaku mund të quhet gjithashtu një i larguar, duke qenë se nuk ka ndërmend që të kthehet në Londër, nëse nuk shitet tek Interi.
Deri tani Çelsi ka arkëtuar 200 milionë nga shitjet, por sërish, numri është shumë i lartë dhe ideja është që të shiten të paktën edhe 8-9 të tjerë në vazhdim, për t’ia bërë më të lehtë punën edhe trajnerit Poçetino, i cili ka vërtet një detyrë shumë të vështirë në administrimin e këtyre futbollistëve, deri në fund të merkatos.
PANORAMASPORT.AL
