Milani mund të përfitojë nga një ndihmë e papritur nga Federata Italiane e cila po kërkon zyrtarisht ndërrimin e rregullores sa u përket lojtarëve ekstrakomunitarë në Serinë A, atyre të regjistruar me shtetësi jashtë Bashkimit Europian.
Federata italiane i është drejtuar Komitetit Olimpik që të miratojë ndryshimin në rregulloret e aktiviteteve sportive, ku të gjithë sportistët që vijnë nga Britania e Madhe, të vazhdojnë të cilësohen “komunitarë”, siç kanë qenë më përpara dhe siç ndodh me zviceranët, edhe pse janë jashtë Bashkimit Europian. Një vendim që është bërë i detyrueshëm për shumë klube, të cilat kanë lojtarë britanikë në përbërjen e tyre dhe kanë vështirësi të regjistrojnë ekstrakomunitarë të tjerë.
Një ndihmë të madhe nga ky ndryshim pritet ta marrë sidomos Milani dhe Roma. Kuqezinjtë kanë në radhët e tyre Ruben Loftus-Çik dhe Fikajo Tomori, ndërsa Roma ka Tami Abraham dhe Kris Smalling, të katërt britanikë. Me rregullat e reja, ata nuk do të zinin vendet e ekstrakomunitarëve, duke i dhënë mundësinë klubeve përkatëse që të nënshkruajnë lojtarë të tjerë.
PANORAMASPORT.AL
