Kristiano Xhuntoli ka nisur nga puna në krye të Juventusit si drejtor sportiv pasi u largua nga Napoli, teksa synon që të plotësojë dëshirat e Alegrit në këtë merkato por është i qartë se fillimisht duhet të shesë disa lojtarë përfshirë Vlahoviç e më pas të nisë me afrimet.
Në listën e torinezëve është Romelu Lukaku. Sulmuesi belg është i paqartë për të ardhmen e tij duke qenë se Interi i ka mbyllur dyert pas negociatave me bardhezinjtë. Megjithatë, Lukaku nuyk është dëshira e vetme e Juventusit në këtë merkato vere.
Mediat italiane raportojnë se Xhuntoli do të largohet nga Amerika ku ndodhet me skuadrën menjëherë pas ndeshjes ndaj Milanit. Ai do të udhëtojë në drejtim të Londrës ku do të ketë takim me drejtuesit e Çelsit për Lukakun e njëkohësisht do të takojë edhe drejtuesit e Leisterit për të tentuar shërbimet e mbrojtësit Timoti Kastanje.
Mbrojtësi belg ka bërë një sezon të mirë në Premier Ligë por sezonin e ardhshëm “dhelprat” do të luajnë në Championship dhe për mbrojtësin 27-vjeçar, Seria A do të ishte opsioni më i mirë i mundshëm.
PANORAMASPORT.AL
